Жетісу облысында "Учаске" іс-шарасының қорытындысы жарияланды, – деп хабарлайды Polisia.kz.
Жетісу облысында 680 мыңнан астам тұрғын бар — бұл мыңдаған отбасылар, көшелер мен аулалар. Олардың әрқайсысының басты тілегі – қауіпсіздік пен ертеңгі күнге деген сенім. Дәл осы мақсатты орындау — қоғам қауіпсіздігін күшейту үшін полиция, ҚР Ұлттық ұланы, мемлекеттік органдар, қоғамдық бірлестіктер және еріктілер бірлесіп кең көлемді профилактикалық "Учаске" профилактикалық іс-шарасын жүзеге асырды.
Қазақстан Республикасының Президенті Қасым-Жомарт Тоқаев осындай үйлесімді жұмыстың маңызын атап өтті.
— Әділет пен тәртіп — халықтың ертеңгі күнге деген сенімінің негізі. Әр азаматтың қауіпсіздігін қамтамасыз ету — мемлекет алдындағы басты міндет. Біз ешкімді назардан тыс қалдырмауымыз керек, — деп атап өтті Мемлекет басшысы.
Ауқымды профилактикалық іс-шара аясында 221 қылмыстық іс қозғалды, 65 000 көпқабатты мен 138 000 жеке тұрғын үй және саяжай учаскелері қамтылған кең көлемді аула аралау жүргізілді, 312 заңсыз пәтер жалға беру дерегі анықталды, нарықтарда 1 300-ден астам тексеріс жүргізіліп, құқық бұзушылықтар тіркелді. Тұрақты мекенжайы жоқ 84 адам ұсталды, кәмелетке толмағандар тарапынан 708 құқық бұзушылық анықталды.
Полиция есебінде тұрған 7 000 адам тексеріліп, 418 көші-қон режимін бұзу дерегі тіркелді. Отбасылық-тұрмыстық жанжалдар, ата-аналық міндеттерді орындамау, ұсақ бұзақылық және басқа да құқық бұзушылықтар үшін 36 000-нан астам адам жауапкершілікке тартылды. Сондай-ақ есірткі жарнамасын насихаттайтын 3 граффити анықталып, жойылды.
Бұл көрсеткіштер — жай есеп қана емес. Мұндай профилактика — статистика емес, қоғам тыныштығын сақтайтын тірі механизм. Іс шара — көшелердің тыныштығын нығайтып, балаларды қорғайды, отбасылар арасында жанжалдың алдын алуға көмектеседі. Учаскелік қызмет — әсіресе шағын елді мекендерде мемлекет пен халық арасындағы алғашқы байланыс. Сондықтан мұнда тек нәтижелілік емес, сенім де шешуші рөл атқарады.
