Жетісу облысында жол қозғалысы қауіпсіздігіне бағытталған рейд өтті, – деп хабарлайды Polisia.kz.
Жетісу облысының патрульдік полиция ротасы мен патрульдік полиция батальонының қызметкерлері Талдықорған қаласында жол қозғалысы қауіпсіздігін арттыруға бағытталған профилактикалық іс-шаралар өткізді. Профилактикалық жұмыстар барысында қысқа уақыт ішінде жол қозғалысы ережелерінің 120-дан астам бұзушылығы анықталды.
Полиция қызметкерлері жол-көлік оқиғаларының алдын алуға, көлік құралдарын дұрыс емес тоқтату және тұраққа қою деректерін анықтауға, сондай-ақ жүргізушілердің көлік басқару кезінде ұялы телефон пайдалану фактілеріне ерекше назар аударды.
— Мұндай құқық бұзушылықтар жол қозғалысына қатысушылардың барлығының қауіпсіздігіне тікелей әсер етіп, қала жолдарында апатты жағдайлардың туындауына себеп болуы мүмкін. Профилактикалық іс-шаралардың мақсаты — жазалау емес, жол-көлік оқиғаларының алдын алу және жүргізушілер арасында тәртіп қалыптастыру. Жол қозғалысы ережелерін сақтау — азаматтардың өмірі мен денсаулығын қорғаудың басты кепілі, — деп атап өтті полиция өкілдері.
Патрульдік полиция батальонында жолдардағы құқықбұзушылықтардың алдын алу жұмыстары тұрақты негізде жалғасатыны айтылды. Тәртіп сақшылары жүргізушілер мен жаяу жүргіншілерді жол қозғалысы ережелерін қатаң сақтауға және жолда өзара сыйластық танытуға шақырады.
