Жаркент қаласында полиция қызметкерлері интернет-алаяқтықтың жаңа қауіп-қатерлерінен халықты қорғауға бағытталған кең ауқымды профилактикалық іс-шара өткізді, – деп хабарлайды Polisia.kz.
Ерекше назар банкоматтар жанында қаржылық операция жасайтын тұрғындарға аударылды. Сол жерлерге "несие қатысты рәсімдерді немесе ақша аударым жасамас бұрын, ойланып, салдарын бағамдаңыз, қаржылық шешімге асықпау маңызды" деген ескертумен полиция қызметкерінің макеті орнатылды.
Полицейлердің айтуынша, көптеген жәбірленушінің басты қателігі – виртуалды алаяқтарға сеніп қалу. Алаяқтардың әдістеріне алданбау үшін азаматтарға беймәлім сілтемелер мен қосымшалар арқылы қоңырау шалмау, тек абоненттік нөмірге тікелей қоңырау шалу ұсынылады. Акция барысында тәртіп сақшылары қала тұрғындарына 400-ден астам ақпараттық парақша таратты. Онда алаяқтардың, соның ішінде нейрожелілерді пайдалану арқылы жасалатын айла-тәсілдері және қаржыны қорғаудың негізгі жолдары егжей-тегжейлі түсіндірілген.
Полицияның мәлімдеуінше, интернетте елеулі қауіптер бар, сондықтан мұндай акциялардың басты мақсаты – азаматтарды алдын ала ескерту, олардың қаржылық мәселелерге мұқият әрі сақ қарауын қамтамасыз ету.
