Жетісу облысының Көксу ауданында орналасқан "Қарлығаш" жазғы демалыс лагерінде "Нашақорлыққа қарсымыз" атты ұранмен нашақорлықтың алдын алуға бағытталған кең ауқымды іс-шара ұйымдастырылды, - деп хабарлайды Polisia.kz.
Бұл акцияны облыстық есірткі қылмыстарына қарсы іс-қимыл басқармасының мамандары мен нашақорлықтың алдын алу жөніндегі кеңес мүшелері бірлесіп өткізді.
Шараға "Қос қанат" қоғамдық қорының психологы және облыстық психикалық денсаулық орталығының нарколог-дәрігері арнайы шақырылды. Олар лагерьде демалушы балалармен кездесу өткізіп, салауатты өмір салтының маңызы мен зиянды әдеттердің алдын алу жолдары туралы жан-жақты түсінік берді.
Іс-шараның басты ерекшелігі — оның интерактив форматта ұйымдастырылуында. Балалар өздерінің шығармашылығын ортаға салып, сурет салу байқауына қатысты, сондай-ақ зияткерлік ойындар, шахмат пен дойбы турнирлері, баскетбол жарысы сияқты түрлі танымдық әрі спорттық белсенділіктерге тартылды.
Полиция қызметкерлері балаларға есірткі қолданудың құқықтық және әлеуметтік салдары туралы айтып, құқық қорғау органдарының рөлі мен оларға сенім білдірудің маңызын жеткізді.
Кездесу соңында кеңес мүшелері қатысушыларға зиянды әдеттерден аулақ болу, спортпен шұғылдану және белсенді өмір сүру жөнінде пайдалы кеңестер берді.
Іс-шараға барлығы 100 бала қатысты. Белсенділік танытқан қатысушыларға естелік сыйлықтар табыс етілді.
Бұл акция – жастар арасында есірткіге қарсы иммунитет қалыптастыруға бағытталған маңызды қадамдардың бірі. Ол полиция, медицина саласы және үкіметтік емес ұйымдардың өзара тиімді ынтымақтастығының нақты әрі табысты үлгісіне айналды.
