Жетісу облысының жазғы лагерлерінде есірткіге қарсы акция өтті, – деп хабарлайды Polisia.kz.
Шілде айында “Көктөбе” жазғы лагерінде полиция департаментінің есірткі қылмысына қарсы іс-қимыл басқармасының қызметкерлері білім басқармасы және “Қос Қанат” ҮЕҰ бірлесіп, облыстық психикалық денсаулық орталығының нарколог-дәрігерінің қатысуымен балаларға арналған іс-шара өткізді.
Балалар үшін түрлі конкурстар, спорттық жарыстар, сондай-ақ зияткерлік және квест ойындары ұйымдастырылды. Іс-шараға 120-дан астам бала қатысты. Бағдарлама басталмас бұрын балалар флешмоб биін ұйымдастырып, барлығына күні бойы жақсы көңіл-күй сыйлады.
Кездесу барысында полицейлер есірткі заттарының заңсыз айналымына байланысты және басқа да құқық бұзушылықтарды жасағаны үшін қылмыстық жауапкершілікті талқылап, түсіндіру жұмысын өткізді. Бұл ақпарат балалар мәселенің маңыздылығы мен заңсыз әрекеттердің салдарын түсіну үшін қолжетімді түрде ұсынылды.
– Іс-шараның соңғы бөлігі балалар дайындаған есірткіге қарсы тақырыптағы театрландырылған қойылым болды. Бұл шығармашылық тәсіл салауатты өмір салтын ұстанудың және есірткіден бас тартудың маңыздылығын тағы бір рет атап өтті. Мұндай акциялар жастардың бойында дұрыс өмірлік құндылықтарды қалыптастыруға және өскелең ұрпақ арасында нашақорлықтың таралуына жол бермеуге көмектеседі деп үміттенеміз, – деп атап өтті ПД есірткі қылмысына қарсы іс-қимыл басқармасының аға жедел уәкілі Мерует Искакова.
