Жетісу облысының полицейлері жазғы лагерде демалушы балалар арасында профилактикалық іс-шаралар өткізді, – деп хабарлайды Polisia.kz.
Профилактика — нашақорлық пен есірткі бизнесіне қарсы күрестің тиімді әдістерінің бірі.
– Полиция департаментінің басшылығы тұрақты профилактикалық іс-шараларды жүргізе отырып, осы бағытқа ерекше көңіл бөледі, — деп атап өтті ПД есірткі қылмысына қарсы іс-қимыл басқармасының аға жедел уәкілі Меруерт Искакова.
Жетісу облысында 13 жазғы балалар лагері жұмыс істейді. Маусым айынан бастап бұл лагерлерде демалушы балалар арасында профилактикалық іс-шаралар өткізіліп жатыр.
Ағымдағы жылдың 1 тамызында Нашақорлыққа және есірткі бизнесіне қарсы күрестің 2023-2025 жылдарға арналған кешенді жоспарын іске асыру шеңберінде «Офлайн демалыс» жазғы лагерінде (Текелі қ.) облыстық полиция департаментінің есірткі қылмысына қарсы іс-қимыл басқармасының қызметкерлері білім басқармасымен бірлесіп, «Қос Қанат» үкіметтік емес ұйым өкілінің және облыстық психикалық денсаулық орталығының нарколог-дәрігерінің қатысуымен түрлі конкурстар, спорттық эстафеталар, сондай-ақ зияткерлік және квест ойындарын өткізді.
Кездесу барысында есірткі сатуға қатысқаны, интернет-дүкендерді жүргізгені, есірткі салғаны және есірткінің заңсыз айналымына байланысты басқа да құқық бұзушылықтар үшін қылмыстық жауапкершілік туралы түсіндірме әңгіме өткізілді.
Іс-шараға барлығы 80 бала қатысты.
