Жетісуда полицейлерге заң үстемдігі бойынша оқу сабақтары өтті, - деп хабарлайды Polisia.kz.
Полицияның бастамасымен прокуратура қызметкерлері қызметтік іс-әрекет барысында азаптауға жол бермеу қағидатының абсолютті маңызын және құқықтық тәртіпті сақтау мәселелерін түсіндіруге арналған оқыту сабақтарын өткізді. Аталған іс-шара Жетісу облысындағы барлық полиция бөлімшелері үшін маңызды болып, құқықтық мәдениетті арттыруға және кәсіби этика стандарттарын нығайтуға бағытталды.
Оқу барысында прокурорлар Қазақстан Республикасының Конституциясында, сондай-ақ қылмыстық және қылмыстық-процестік заңнамада белгіленген негізгі талаптарға жан-жақты тоқталды. Азаптаудың заңмен қатаң тыйым салынған ауыр қылмыс екені және оның құқық қорғау органдарының қызметтік миссиясымен мүлдем үйлеспейтіні ерекше атап өтілді. Заңсыз жолмен алынған кез келген ақпарат қылмыстық процесте дәлел ретінде қолданылмайтыны, мұндай әрекеттер белгіленген тәртіпті бұзып, сот төрелігіне деген сенімге нұқсан келтіретіні түсіндірілді.
Баяндамалардың негізгі мазмұны полиция қызметінің заңға және адам құқығына құрметтен басталатынын айқындауға бағытталды. Кәсіби қызмет ашықтыққа, заңдылыққа және құқықтық мінез-құлық мәдениетіне негізделуі тиіс. Әрбір полиция қызметкері азаматтармен жұмыс барысында тек ведомствоның ғана емес, мемлекеттің атынан әрекет ететінін ескере отырып, адамның құқықтары мен бостандықтарын сақтау жөнінде айрықша жауапкершілік арқалайтыны атап өтілді. Бұл қағидаларды бұзу қоғам сенімінің жоғалуына және қызметтік әрекеттердің құқықтық күшінің жойылуына әкелетіні жеткізілді.
Оқыту сабақтарында іс-әрекеттерді дұрыс құжаттау, ұстау тәртібін қатаң сақтау, қорғаушыға қолжетімділікті қамтамасыз ету және кез келген қысым көрсетуге жол бермеу мәселелеріне ерекше назар аударылды. Бұл талаптар формалды міндет ретінде емес, қазіргі заманғы құқықтық жүйенің іргетасы, онда заңға адал қызмет ету кез келген жедел міндеттен жоғары тұратыны ретінде түсіндірілді.
Полиция қызметкерінің еңбегі – тек қызметтік міндеттерді орындау ғана емес, сонымен қатар күн сайын адам қадір-қасиетіне, қоғамға және мемлекетке деген құрметті іс жүзінде көрсету.
Аталған кездесулер құқық қорғау жүйесін жаңғырту аясында заң үстемдігін нығайтуға және мемлекеттік қызмет сапасын арттыруға бағытталған маңызды қадамдардың бірі болып табылады. Бүгінде қазақстандық полиция өз қызметінің әрбір бағыты халықаралық және ұлттық үздік құқықтық стандарттарға сай болуын көздейді, ал қоғамның сенімі ашықтық, кәсібилік пен әділдіктің нақты нәтижесіне негізделуі тиіс.
