Жетісуда үш жыл бойы жазасыз жүрген жүргізуші ұсталды, - деп хабарлайды Polisia.kz.
Жетісу облысында жол қозғалысы ережелерін жүйелі түрде бұзып келген жүргізуші ақыры полицияның қолына түсті. Ол үш жыл бойы түрлі құқық бұзушылықтарға жол беріп, айыппұл төлеуден жалтарып келген. Жүргізушінің жалпы қарызы 715 мың теңгеге жеткен.
Құқық қорғау органдарының мәліметінше, Nissan автокөлігінің иесі бірнеше рет жол ережесін бұзып, әкімшілік жауапкершілікке тартылған. Алайда салынған айыппұлдарды төлеуден қашып, жазасыз қалу үшін түрлі амалдар жасаған. Дегенмен "Қорғау" қосымшасының көмегімен полиция қызметкерлері оны анықтап, қолға түсірді.
Жолдағы қауіпсіздік – әр жүргізушінің жауапкершілігі. Полиция азаматтарды жол қозғалысы ережелерін қатаң сақтауға шақырады. Цифрлық технологияларды, соның ішінде "Қорғау" жүйесін қолдану – тәртіп бұзушыларды анықтауға және жол қауіпсіздігін қамтамасыз етуге зор мүмкіндік береді.
