Жетісуда жас полицейлер ант қабылдады, - деп хабарлайды Polisia.kz.
Жетісу облысы полиция департаментінде жас тәртіп сақшыларының қызметтік ант қабылдау рәсімі өтті. Бұл – олардың құқық қорғау саласындағы жауапты жолының ресми басталуы ғана емес, сонымен қатар қоғам алдындағы үлкен жауапкершілікті саналы түрде мойнына алу сәті.
Салтанатты шара барысында жас мамандар "Заң және Тәртіп" қағидаттарына адал болуға, қызметтік міндетін абыроймен атқаруға және халқы мен Отанына қалтқысыз қызмет етуге серт берді.
Полиция департаментінің басшылығы жас қызметкерлерге ізгі тілектерін арнап, анттың – жай ғана рәсім емес, бүкіл қызмет жолындағы моральдық бағдар екенін баса айтты. Олар болашақ полицейлерге батылдық, сабыр, өз ісіне адалдық пен кәсіби биіктерге жетуді тіледі.
Мұндай рәсімдер жас мамандардың бойында елге деген сүйіспеншілік пен қызметке берілгендік рухын қалыптастырып, ішкі істер органдарындағы ұрпақтар сабақтастығы мен ынтымақты бекемдей түседі. Ар-намыс пен борыш – тәртіп сақшысының басты ұстанымы, ал бұл серт – сол жолдағы алғашқы және ең маңызды қадам.
