Көлік тізгіндеген жүргізушілер үшін жолдағы жануарлар қауіп төндіреді, бұған дәлел – жол-көлік оқиғалары фактілерінің орын алуы. Полицейлер солтүстікқазақстандықтарды, әсіресе көктем-жаз мезгілдерінде, үй жануарларын еркін жайылымға шығару кезеңі басталған кезде ерекше қырағы болуға шақырады, – деп хабарлайды Polisia.kz.
– Ескертетін жол белгілері, макеттер орналасқан жерлерде жылдамдықты азайту керек. Соқтығысуды кейде, әсіресе кешкі уақытта, тайғақ асфальттің үстінде алдын алу мүмкін болмай жатады. Бұндай жағдайда жарық шағылыстыратын таспалардың көмегін атап өткен жөн. Көбінесе, қараусыз жүрген жануарлар жол-көлік оқиғаларына ұшырап жатады. Бұдан бөлек ұрылардың олжасына айналуы мүмкін, – деп атап өтті СҚО Полиция департаменті Жергілікті полиция қызметі басқармасының бастығы Айдын Байматов.
Жыл басынан Шал ақын ауданында екі жылқы автокөлік астына түскен. Ал Тайынша ауданында жануардың қатысуымен жол-көлік оқиғасы сәуірдің 8-і күні шамамен кешкі сағат 10-да орын алған. Nissan Primera көлігінің 31 жастағы жүргізушісі қараңғы жарық түспеген жолмен келе жатып, Алабота ауылының маңында құлынды дер кезінде байқамай қалып, қағып кеткен. Nissan көлігінде баламен бірге ерлі-зайыптылар болған. Олар зардап шеккен жоқ. Жол-көлік оқиғасы нәтижесінде автокөлік зақымдалды.
