Павлодар облысында есірткіге мас күйде көлік басқарған азамат анықталды, – деп хабарлайды Polisia.kz.
Шілде айының соңында Павлодар – Кенжекөл автожолындағы рейдтік іс-шаралар кезінде полиция қызметкерлері Mercedes-Benz көлігін тоқтатты. Түсініксіз сөздері, хаотикалық қозғалыстары және көзінің қарашығы үлкейгені тоқтаған шетелдік көліктің жүргізушісінің жағдайы нашар екенін көрсетті. Медициналық куәландыру нәтижелері бойынша жүргізуші есірткіге мас болған.
Тексеру кезінде 29 жастағы жүргізуші есірткіге мас күйінде ғана емес, оған құқығы жоқ көлік құралының рөліне отырғаны анықталды. Сот шешімімен ол 2022 жылдың наурызында 7 жыл мерзімге көлік құралын жүргізу құқығынан айырылған.
Осы факті бойынша Қазақстан Республикасы ҚК-нің 346-бабымен сотқа дейінгі тергеу басталды. Автокөлік айып тұрағына қойылды.
