Мақтаарал полицейлері Жаңа жыл мерекесі қарсаңында ерекше балаларды қуантты, – деп хабарлайды Polisia.kz.
Мақтаарал ауданы ПБ-ның тәртіп сақшылары айтулы мереке қарсаңында балалар үшін маңызды шараларды назардан тыс қалдырмай, ерекше көңіл бөлді. Бұл жолы жылдағы дәстүр бойынша аудандағы “Мейірім шапағаты” оңалту орталығына барып, балаларға сыйлықтар табыстады.
Жалпы, полиция қызметкерлері үшін мұндай игі шараларға атсалысу дәстүрге айналған. Олар бірнеше жылдан бері аталған орталықтың іс-шараларына белсене араласып, қолдауларын көрсетіп, әрбір мерекеде балалардың көңілін аулауға тырысады.
Өз кезегінде мақтааралдық сақшылар балалардың бал-бұл жанған жүздерінен қуаныш сезімін көруден асқан бақыт жоқ екенін айтып өтті.
