Петропавлда кәсіпкерлік объектілерінде құқықтық тәртіпті қамтамасыз ету сұрақтары талқыланды, – деп хабарлайды Polisia.kz.
Кәсіпкерлік объектілерінде құқықтық тәртіпті қамтамасыз етумен байланысты ойын-сауық мекемелерінің жұмыс уақыты, пәтерлер бюросы жұмысы мен басқа да мәселелер «Атамекен» кәсіпкерлер палатасының алаңында талқыланды.
– Диалогтің мақсаты – дағдарыс жағдайы туындаған кезде бірлескен іс-қимыл алгортимін жасау және құқық бұзушылыққа жағдай жасайтын алғышартты жою. Барлығымыз күш біріктіріп, қоғамдық қауіпсіздікті, кәсіпкерлердің мүлкінің сақталуын қамтамасыз ету, заң бұзушылықтарға жол бермеуіміз қажет, – деп тоқтала кетті СҚО ПД бастығының бірінші орынбасары Қанат Айтбаев.
Құқықтық тәртіпті нығайтудағы негізгі көмек – бейнебақылау жүйесі, сондықтан полицейлер кәсіпкерлердің камераларды барынша қолдану қажеттілігіне көңіл аударады. Осындай «көмекшілер» кәсіпкерлік объектілерінің бәрінде бар деуге болмайды. Кездесудің қатысушылары атап өткендей, камералар мен дабыл батырмаларының болуы туралы талаптар заңнамамен тек террористік тұрғыда осал объектілерде ғана көзделген. Мұндай объектілерге ойын-сауық мекемелерінің бір бөлігі ғана жатады. Солтүстік Қазақстан облысында 700 аса осындай объекті бар, оның 100 астамы кәсіпкерлік объектісі.
Түнгі сағат екіден кейін жұмыс істейтін кейбір ойын-сауық мекемелерінің жұмыс режимі полицейлердің наразылығын туғызады. Атап айтқанда, осы уақыт аралығында бұзақылық, төбелес пен басқа да құқық бұзушылық жиі орын алады. Қалалық полиция басшылығы туындаған жағдайды ескере отырып, «түнгі» дәмханалардың жұмыс режимін қайта қарауды ұсынды.
Бұдан бөлек, кездесудің қатысушылары атап өткендей, ойын-сауық мекемелерінің барлығы бірдей күзет, сигнализация батырмасын қоймаған.
Кездесу шеңберінде тәулік бойы жалға берілетін пәтер мәселесі тағы бір тармақта талқыланды. Сонымен қатар, полицейлер түнгі уақытта кәмелетке толмағандардың ойын-сауық мекемелерінде болу фактісіне көңіл аударды.
