Белгіленбеген жерлерден теміржолды кесіп өткені үшін 20 819 азамат әкімшілік жауапкершілікке тартылды, – деп хабарлайды Polisia.kz.
Осы жылдың 9 айында көлік полицейлері «Темір жол – қауіптілігі жоғары аймақ!» тақырыбында оқу орындарында 2124 дәріс, 2147 халықпен кездесу, 3318 рейдтік іс-шаралар өткізді.
– Профилактикалық іс-шараларды өткізу кезінде азаматтардың назарын темір жол төсемінің белгіленбеген жерлерінен өтуді тек құқық бұзушылық емес, бұл олардың өмірі мен денсаулығы екендігіне назар аударамыз, – деді көліктегі полиция департаментінің бастығы Бақытжан Малыбаев.
Ол жүргізіліп жатқан профилактикалық іс-шараларға қарамастан, азаматтардың темір жолдарда белгіленбеген жерлерден өтуі, ондағы қауіпсіздік ережелерін сақтамауы және темір жолға арналған жолақта мал жаю фактілері жалғасып жатқанын айтты.
Б. Малыбаевтың айтуынша, осы жылдың 9 айында еліміз бойынша пойыздарды шұғыл тежеудің 1381 фактісі тіркелген, оның ішінде адамдардың болуына байланысты 305, темір жол төсемінде үй жануарларының болуына байланысты 902 және т.б. Белгіленбеген жерлерден теміржолды кесіп өткені үшін 20 819 азамат әкімшілік жауапкершілікке тартылды.
– Мәселен, өткен демалыс күндері төрт адам пойыздың астына түсіп кете жаздады. Бұл фактілер Астана, Орал, Шу және Қызылорда станцияларында тіркелді. Бір қуанарлығы, барлық жағдайда машинистер теміржол құрамын тоқтатып, қайғылы жағдайдың алдын алды.
Жоғарыда көрсетілген фактілер бойынша құқық бұзушыларға ҚР ӘҚБтК-нің 559-бабының 5-бөлігі (Белгiленбеген жерлерде темiржол арқылы өту) бойынша әкімшілік хаттама толтырылды, – деді ведомство басшысы.
Осы жылдың 9 айында 66 азамат пойыз астына түсті, оның жартысынан көбі көз жұмды, сондай-ақ 29 адам жарақат алды. Барлық фактілер бойынша сотқа дейінгі тергеп-тексерулер жүргізілді.
– Азаматтардың теміржол жол жарақатын алуларының негізгі себептері – олардың тиісті жабдықталған өткелдерді пайдаланғысы келмеуінен, жазатайым оқиғалардың көпшілігі тұрғындардың қауіпсіздік шараларын сақтамаудан орын алады, – деп түйіндеді сөзін полиция полковнигі.
Ол азаматтарды теміржол арқылы рұқсат етілген өткелдерді пайдалануға және өз қауіпсіздіктері үшін ережелерді қатаң сақтауға шақырды.
