Атырауда полицейлер арасында шахматтан турнир өтті, – деп хабарлайды Polisia.kz.
13 қараша күні полиция қызметкерлері арасында Атырау облысы полиция департаменті «Динамо» спорт және дене шынықтыру қоғамы қоғамдық бірлестігі Атырау облысы бойынша филиалы және Атырау облыстық шахмат федерациясының бас төрешісі Аралбек Махмутовпен бірге ақыл-ой өрісті дамытатын үстел спорт түрлерінің бірі болып саналатын шахмат ойынынан турнир өткізді. Мақсаты – тәртіп сақшыларының ойын шыңдау және әріптестік қолдауға ықпал ету.
Турнирде Атырау облысы полиция департаменті, Атырау қаласы полиция басқармасы, №1, №2 қалалық полиция бөлімінің қызметкерлерінен құралған 11 қызметкер бақ сынады. Тартысты сайыстың қорытындысы бойынша өзгелерден озып шыққан Атырау қаласы полиция басқармасының учаскелік полиция инспекторы Шыңғыс Әбдіров I орынды, Атырау қаласы полиция басқармасының қабылдап-тарату орнының қызметкері полиция кіші сержанты Сайфулла Санжан II орынды иеленіп, қараша айында Алматы қаласында өткізілетін республикалық турнирге жолдама алды. Ал Атырау облысы полиция департаменті жылдам қимылдайтын арнайы жасақ тобының аға инспекторы полиция майоры Айбол Әлібекұлы үздіктердің көшін тәмамдап, III орынды қанжығаға байлады.
