Қостанай облысының анықтау органдары денсаулыққа жеңіл зиян келтіру және ұрып-соғу фактілеріне қатысты қылмыстық істерді тергеу және сотқа жеткізу бойынша, оның ішінде отбасылық-тұрмыстық қатынастар аясында да жүйелі жұмыстарын жалғастыруда, – деп хабарлайды Polisia.kz.
Осы жылдың өткен кезеңінде өңірде денсаулыққа жеңіл зиян келтіру және ұрып-соғудың 286 фактісі тіркелді. Бұл деректер мәселенің бар екендігін ғана емес, сонымен бірге құқық қорғау органдарының оны анықтап, жолын кесудегі белсенді іс-қимылдарын көрсетеді.
Анықтаушылар мен учаскелік инспекторлардың үйлесімді жұмысының нәтижесінде сотқа 63 қылмыстық іс жолданды. Олардың 30-ы қаралып, кінәлілер тиісті жазасын алды.
Қаралған істердің арасында ерекше қоғамдық резонанс тудырғандары да бар. Мәселен, Лисаков қаласында Б. есімді азамат өзінің өгей ұлына бір жыл ішінде қайталап дене жарақатын келтіргені үшін кінәлі деп танылып, 1 жылға бас бостандығынан айыру жазасына кесілді.
Сонымен қатар, сот үкімдері бойынша 4 адам бас бостандығын шектеуге, 16 адам 20-дан 80 сағатқа дейінгі мерзімде қоғамдық жұмыстарға, тағы 9 адам заң аясында жауапқа тартылды.
Анықтау кезеңі заңдылықты қамтамасыз ету мен жәбірленушілерді қорғауда маңызды рөл атқарады. Осы кезеңде дәлелдер жиналып, істің мән-жайы анықталады, сондай-ақ жәбірленушілердің құқықтарын қамтамасыз ету шаралары қабылданады.
Анықтау органдары прокуратурамен, соттармен, сондай-ақ әлеуметтік қызметтермен, әсіресе жәбірленушілер балалар болған жағдайларда тығыз ынтымақтастықта жұмыс істейді.
