СҚО-да полицейлер жаңа оқу жылындағы балалардың қауіпсіздігін талқылады, - деп хабарлайды Polisia.kz.
Солтүстік Қазақстан облысы полиция департаменті бастығының орынбасары Құрманғали Ысмағұлов жаңа оқу жылының алғашқы күндеріне орай ювеналдық полиция инспекторлары мен учаскелік полицейлердің жұмыс күнін мектептен бастауға тапсырма берді. Бұл мәселе білім басқармасы өкілдерімен өткен жиында қаралды. Кездесу Білім күні қарсаңында өтіп, оқу орындарындағы балалардың қауіпсіздігіне арналды.
- Облыста кәмелетке толмағандар жасаған қылмыстар саны 34,4%-ға төмендеді, 19 дерек тіркелді. Бірақ бұл арқаны кеңге салуға себеп емес. Біз олардың санын мүлде жоюға ұмтылуымыз қажет, – деді Құрманғали Ысмағұлов.
Кәмелетке толмағандардың қылмысқа қатысуына жол бермеу үшін жүйелі түрде профилактикалық жұмыс жүргізілуі тиіс. Осы мақсатта өңірдегі 446 мектептің әрқайсысына учаскелік инспекторлар, ювеналдық полиция қызметкерлері, жедел уәкілдер және басшылық құрам офицерлері бекітілген.
Жиын барысында балалардың қауіпсіздігіне қатысты барлық аспектілер егжей-тегжейлі талқыланды: оқу орындарының маңындағы жол инфрақұрылымынан бастап, мектептердегі бейнебақылау жүйесінің жұмыс істеуіне дейін. Жаңа оқу жылының алғашқы күндерінде қауіпсіздік шаралары күшейтіледі: патрульдік және ювеналдық полиция қызметкерлері, учаскелік инспекторлар сабақ басталар және аяқталатын уақытта мектептердің жанында кезекшілік етеді, оқу орындарына кешенді полиция күштерінің бағыттары жақындатылатын болады.
Балалардың қорғалуы – "Заң және Тәртіп" қағидатын іске асырудағы басты бағыттардың бірі. Бұл саладағы барлық мәселелер облыстық полиция департаменті басшылығының бақылауында.
