Ақмола облысында "Бақытты отбасы – бақытты ел" республикалық акциясы басталды, - деп хабарлайды Polisia.kz.
27 тамыз бен 10 қыркүйек аралығында елде тұрмыстық зорлық-зомбылықтың алдын алуға, әйелдер мен балалардың құқықтарын қорғауға, отбасы институтын нығайтуға және дәстүрлі құндылықтарды сақтауға бағытталған ауқымды акция өткізіледі.
Іс-шара Ішкі істер министрлігінің қолдауымен атқарушы органдармен үкіметтік емес ұйымдармен, әлеуметтік қорғау, білім беру, денсаулық сақтау органдарымен, бұқаралық ақпарат құралдарының өкілдерімен бірлесіп, сондай-ақ жұртшылық пен жастарды тарта отырып іске асырылады.
28 тамызда Көкшетау қаласы полиция басқармасының отбасылық-тұрмыстық күрес жөніндегі мамандандырылған бөлімінің қызметкерлері облыс орталығының әртүрлі алаңдарында халықты ақпараттандырып, буклеттер тарата отырып, акцияның ашылуын ұйымдастырды.
Келесі күндері акция аясында флешмобтар, көшпелі мобильді іс-шаралар, ардагерлер мен полиция қызметкерлерінің отбасыларымен кездесулер, тақырыптық семинарлар мен тренингтер өткізу көзделген.
Зорлық-зомбылық жағдайында азаматтарды іс-қимыл алгоритмі туралы хабардар етуге, қолайсыз отбасыларға көмек көрсетуге, сондай-ақ дағдарыс орталықтарының "жедел желілерінің" жұмысына ерекше назар аударылатын болады.
Профилактикалық жұмыс құқық бұзушылармен де жүргізіледі: арнайы қабылдағыштар мен изоляторларда діни қызметкерлер, қоғамдық бірлестіктер өкілдерімен кездесулер жоспарланған.
Акцияның басты мақсаты - тұрмыстық зорлық-зомбылыққа төзбеушілікті қалыптастыру, халықтың құқықтық сауаттылығын арттыру және елдің болашағының негізі ретінде отбасының оң имиджін нығайту.
