Өскеменде "Жас сақшы" полиция сыныптарының кадеттері мен полиция қызметкерлері арасында футбол матчы өтті, - деп хабарлайды Polisia.kz.
Жарыс спорттық бәсекелестікпен қатар, достық рухта өрбіді.
Ойынға қолдау білдірген Шығыс Қазақстан облысы полиция департаменті бастығының орынбасары Серік Манапов кадеттерге жылы лебізін білдірді:
- Сіздер — еліміздің болашағысыздар. Энергияларыңыз, тәртіптеріңіз бен жеңіске деген ұмтылыстарыңыз өзгелерге үлгі. Алдағы турнирде өңірімізді абыроймен танытып, лайықты өнер көрсететіндеріңізге сенімдімін, — деді ол.
Бұл кездесу жас спортшылардың алдағы сынға дайындығының бір бөлігі болды. 2–4 қазан аралығында Шымкент қаласында ҚР Ішкі істер министрінің Кубогына арналған республикалық мини-футбол турнирі өтеді. Жарысқа 12–14 жас аралығындағы "Жас сақшы" полиция сыныптарының оқушылары еліміздің түкпір-түкпірінен жиналады. Турнирдің ұраны да мәнді: "Спорт — нашақорлыққа қарсы".
Шығыс Қазақстан облысының намысын Өскемендегі мектептердің "Жас сақшы" сыныптарынан іріктелген 10 кадет қорғайды. Олар республикалық аренада жеңіс үшін таласа отырып, төзімділік, тәртіп және шеберліктерін көрсетпек. Турнир мини-футболдың ережелері бойынша өткізіліп, балалар спортының дамуына серпін беруді көздейді.
Жас сақшылар сенімді: табандылық пен командалық рух туған өлкеге абырой әкеліп, спорттың — күш-қуат, сергектік және жарқын болашақ кепілі екенін дәлелдеуге мүмкіндік береді.
