Бейнеу ауданында отбасы институтын нығайтуға, ата-аналардың құқықтық мәдениетін арттыруға және жасөспірімдер арасындағы қауіпсіздік мәселелеріне арналған "Мейіріммен өрілген тәрбие" тақырыбындағы кең ауқымды аналар форумы өтті, – деп хабарлайды Polisia.kz.
Іс-шараға 60-қа жуық ана қатысып, балалар тәрбиесіндегі жауапкершілік, отбасыдағы өзара түсіністік және жасөспірімдерді қолдау мәселелері талқыланды.
Форум барысында Бейнеу аудандық полиция бөлімінің аға учаскелік полиция инспекторы Жанар Оразбаева жасөспірімдер арасындағы құқық бұзушылықтардың, тұрмыстық зорлық-зомбылықтың, топтық төбелестердің және буллинг пен кибербуллингтің алдын алу жөнінде кең көлемді түсіндіру жұмыстарын жүргізді.
Полиция өкілі ата-аналардың баланың қауіпсіздігі мен тәрбиесіндегі негізгі рөліне назар аударып, әрбір отбасында ашық қарым-қатынас қалыптастырудың маңызын атап өтті. Әсіресе, әлеуметтік желілердегі қауіп-қатер, бейтаныс адамдармен байланыс, түнгі уақытта көшеде жүру және заңға қайшы әрекеттердің салдары туралы маңызды мәліметтер берілді.
Полиция ата-аналарды балаларымен жиі сөйлесіп, олардың психологиялық, әлеуметтік және қауіпсіздік мәселелеріне бейжай қарамауға шақырады.
