Алматыда "Учаске" республикалық жедел-профилактикалық іс-шарасы аясында ювеналды полиция әлеуметтік тұрғыдан қауіпті жағдайда тұрған балаларды анықтау бағытында ауқымды жұмыс жүргізді, – деп хабарлайды Polisia.kz.
Іс-шара нәтижесінде балаларын тәрбиелеу, оқыту және толық қамтамасыз етуге көңіл бөлмейтін ата-аналар анықталды. Сонымен қатар балаларға қатыгездік пен зорлық-зомбылық фактілерінің алдын алу мақсатында жасөспірімдер полициясы ішкі істер органдарында есепте тұрған 600-ден астам отбасын тексерді.
- Әрбір түскен хабарламаны дереу өңдейміз. Анықталған фактілердің бәрі отбасыны қолдау орталығымен бірлесе отырып комиссияларда қаралады. Ата-аналар балаларын дұрыс қамтамасыз етпегені үшін жауапкершілікке тартылады, және жағдайды түзету үшін нақты мерзімдер белгіленеді, – деп хабарлады Алматы қаласы полиция департаменті қоғамдық қауіпсіздік басқармасының бастығы Асхат Құлбаев.
Ол атап өткендей, атқарылып жатқан жұмыстар жасөспірімдерге қатысты құқық бұзушылықтардың алдын алу және олардың құқықтарын қорғау бағытында жүргізілуде.
- Біздің мақсатымыз – балалардың өмірі мен денсаулығына қауіп төндіретін отбасыларды уақытылы анықтап, жан-жақты шаралар қабылдау. Әрбір жағдайда отбасыға қолдау көрсетіледі және комиссияның ұсыныстарының орындалуы бақылауда болады, – деді Құлбаев.
Іс-шара барысында кейбір отбасыларға жедел көмек қажет екені анықталды. Мысалы, бір отбасында комиссия үй жағдайының нашар екенін анықтап, кемшіліктерді белгіленген мерзімде жоюға міндеттеді. Ал басқа бір отбасында балалар уақытша қолдау орталығына орналастырылды.
