Өскеменде полиция кәмелетке толмағандардың қауіпсіздігін қамтамасыз ету мақсатында рейд жүргізді, — деп хабарлайды Polisia.kz.
Өскемен қаласы аумағында құқық бұзушылықтар мен қылмыстардың алдын алу, сондай-ақ балалардың қараусыз қалуын болдырмау мақсатында рейдтік іс-шара өткізілді.
Рейд Шығыс Қазақстан облысы полиция департаментінің қоғамдық қауіпсіздік басқармасы мен ұйымдасқан қылмысқа қарсы күрес басқармасының бірлесуімен ұйымдастырылды.
Іс-шара барысында полиция қызметкерлері профилактикалық түсіндіру жұмыстарын жүргізіп, кәмелетке толмағандардың ықтимал жиналатын орындарын тексерді, сондай-ақ құқық бұзушылықтарды анықтау және жолын кесу бойынша тиісті шаралар қабылдады. Негізгі назар қоғамдық тәртіпті қамтамасыз етуге, балалардың қауіпсіздігіне және құқыққа қарсы әрекеттерге жол бермеуге аударылды.
Рейд қорытындысы бойынша барлығы 26 құқық бұзушылық анықталды, оның ішінде:
— ҚР ӘҚБтК-нің 442-бабының 2, 3-бөліктері бойынша — кәмелетке толмағандардың заңды өкілдерінің еріп жүруінсіз тұрғын үйден тыс жерде болуының 18 фактісі;
— ҚР ӘҚБтК-нің 442-бабының 1-бөлігі бойынша — кәмелетке толмағандардың заңды өкілдерінің еріп жүруінсіз түнгі уақытта ойын-сауық орындарында болуының 4 фактісі;
— ҚР ӘҚБтК-нің 132-бабы бойынша — кәмелетке толмағандардың түнгі уақытта ойын-сауық орындарында болуына жол беру бойынша 3 дерек;
— ҚР ӘҚБтК-нің 200-бабы бойынша — алкоголь өнімдерін өткізу саласындағы Қазақстан Республикасы заңнамасының талаптарын бұзудың бір дерегі анықталды.
Анықталған барлық дерек бойынша кәмелетке толмағандардың заңды өкілдеріне және ойын-сауық орындарының иелеріне қатысты Қазақстан Республикасының қолданыстағы заңнамасына сәйкес әкімшілік ықпал ету шаралары қолданылды.
Кәмелетке толмағандардың ата-аналарымен және заңды өкілдерімен балалардың бос уақытын тиісті бақылаудың маңыздылығы, сондай-ақ оларды тәрбиелеу мен күтіп-бағу жөніндегі міндеттерін тиісінше орындамағаны үшін жауапкершілік туралы профилактикалық түсіндіру әңгімелері жүргізілді.
Осындай рейдтік іс-шаралар құқық бұзушылықтардың алдын алу, балалардың қараусыз қалуына жол бермеу, сондай-ақ Шығыс Қазақстан облысы аумағында қоғамдық тәртіп пен кәмелетке толмағандардың қауіпсіздігін қамтамасыз ету мақсатында алдағы уақытта да тұрақты негізде жалғасады.
