Мемлекет басшысының Жарлығымен Екібастұз қаласы полиция басқармасының тергеу бөлімінің аға тергеушісі, полиция майоры Жаңылсын Сағадат "Жауынгерлік ерлігі үшін" мемлекеттік наградасымен марапатталды, - деп хабарлайды Polisia.kz.
Мемлекеттік марапатты Жаңылсын Сағадатқа Президент Қасым-Жомарт Тоқаев Халықаралық әйелдер күні қарсаңында өткен салтанатты марапаттау рәсімінде табыс етті. Марапат оның кәсіби шеберлігі, адал қызметі және заң мен құқықтық тәртіпті қамтамасыз етуге қосқан үлесі үшін берілді.
Жаңылсын Сағадат ішкі істер органдарында ұзақ жылдар бойы қызмет атқарып, жоғары жауапкершілік және таңдаған мамандығына деген адалдығын көрсетіп келеді. Оның кәсібилігінің арқасында бірқатар қылмыстық істер сәтті тергеліп, азаматтардың құқықтары сақталды.
Тергеуші бұл мамандыққа Екібастұз қаласының полиция қызметкерлері мен ішкі істер органдары өкілдері өткізген кәсіптік бағдар беру кездесулеріне қатысқаннан кейін қызығушылық танытқан. Мектепті аяқтаған соң ол Қазақстан Республикасы ІІМ Қарағанды академиясына оқуға түсіп, мамандығы бойынша білім алғаннан кейін қалалық полиция басқармасына қызметке қабылданды. Тергеуші ретіндегі алғашқы тәжірибесін ол мүліктік қылмыстармен - ұрлық пен тонаумен күрес бөлімшесінде жинақтады.
- Мен үшін ел Президентінің қолынан мемлекеттік награда алу - үлкен мәртебе. Бұл тек менің еңбегімнің ғана емес, бүкіл ұжымымыздың жұмысына берілген баға. Ішкі істер органдарында күн сайын өз міндетін адал атқарып, азаматтардың құқықтарын қорғап, әділдікті қамтамасыз ететін жандар қызмет етеді. Маған қолдау көрсетіп, сенім білдірген басшылық пен әріптестеріме алғыс айтамын. Алдағы уақытта да заң мен қоғамға адал қызмет етемін, – дейді Жаңылсын Сағадат.
Екібастұз қаласы полиция басқармасының бастығы Төлеген Құдайбергеновтің айтуынша, бұл марапат - күн сайын заң мен азаматтардың қауіпсіздігін қорғап жүрген ішкі істер органдары қызметкерлерінің еңбегіне берілген жоғары баға.
