Абай облысы бойынша қылмыстық-атқару жүйесі мекемесінде сотталған әйелдердің “Ана үйі” қоғамдық қоры өкілдерімен кездесуі ұйымдастырылды, — деп хабарлайды Polisia.kz.
Сапар барысында қатысушыларға кеңестік және психологиялық көмек көрсетіліп, сондай-ақ бостандыққа шыққаннан кейін әлеуметтік қолдау алу мүмкіндіктері түсіндірілді.
Кездесу аясында қор өкілдері балалар үйлерінде тәрбиеленіп жатқан балалары бар сотталған әйелдермен, сондай-ақ бұрын тұрмыстық зорлық-зомбылыққа ұшыраған әйелдермен жеке сұхбат жүргізді. Іс-шараның негізгі мақсаты – құқықтық, психологиялық және әлеуметтік көмек көрсету, отбасылық байланыстарды қалпына келтіруге жәрдемдесу және қоғамға қайта оралуға дайындау болды.
Мекемеде 200-ден астам сотталған әйел жазасын өтеп жатыр, олардың шамамен онынан астамы ата-ана құқығынан айырылған, ал 20-дан астамы бұрын тұрмыстық зорлық-зомбылық көрген. Барлығына ата-ана құқықтарын қалпына келтіру тетіктері түсіндіріліп, қолжетімді қолдау шаралары туралы ақпарат берілді.
Балаларды туыстарының отбасына орналастыру мәселесіне ерекше назар аударылды. Қор өкілдері қамқоршылық рәсімдеу процесін сүйемелдеуге, құқықтық көмек көрсетуге және балалардың туған-туыстарының қолында тәрбиеленуі үшін мемлекеттік органдармен өзара әрекет етуге дайын екендерін атап өтті.
— Мұндай кездесулер сотталған әйелдердің сыртқы әлеммен байланысын үзбеуіне көмектеседі, балаларымен қайта қауышуға үміт береді, олардың психологиялық тұрғыдан қалпына келуіне және бостандыққа шыққаннан кейін заңға бағынатын өмір салтын қалыптастыруына ықпал етеді, — деп атап өтті сотталғандар арасындағы тәрбиелік және әлеуметтік-психологиялық жұмыс бөлімінің бастығы Айнұр Искакова.
Өткізілген кездесу қиын өмірлік жағдайға тап болған әйелдерді қолдау және отбасылық жылу мен қамқорлыққа мұқтаж балалардың құқықтарын қорғау жолындағы тағы бір маңызды қадам болды.
