Цифрлық дәуірдегі полиция қызметінің жаңа келбетін қалыптастуға үлес қосып жүрген кәсіби офицер қызметінің қыр-сырымен бөлісті, — деп хабарлайды Polisia.kz.
Астана қаласы полиция департаментінің цифрландыру және жасанды интеллект басқармасында бөлім бастығы қызметін атқаратын Жұлдыз Байленова – ішкі істер органдарындағы ұзақ жылдық тәжірибесі мен заманауи технологиялық ойлау жүйесін ұштастыра білген білікті басшы.
2003 жылдан бері ішкі істер органдарында қызмет етіп келе жатқан Жұлдыз Масғұтқызы құқық қорғау саласының түрлі кезеңдерінен өтіп, кәсіби тұрғыда үлкен мектеп қалыптастырған маман. Ол жылдар бойы тек тәртіп пен заңдылықты қамтамасыз ету ісінде ғана емес, сонымен қатар басқару мәдениетін жаңғырту, цифрлық шешімдерді енгізу және полиция қызметін жаңа форматқа бейімдеу бағытында үздіксіз еңбек етіп келеді.
Бүгінде ол жетекшілік ететін бөлім – Астана қаласы полициясының цифрлық трансформациясының маңызды тіректерінің бірі. Мұнда деректерді талдау, жасанды интеллект элементтерін енгізу, жедел басқару жүйелерін жетілдіру және қызмет тиімділігін арттыруға бағытталған инновациялық жобалар жүзеге асырылады. Бұл бағыттағы жұмыс оның стратегиялық ойлау қабілетін, технологияға деген қызығушылығын және өзгерістерді басқарудағы тәжірибесін айқын көрсетеді.
Тәртіп сақшысы – талапшыл ғана емес, өз ісіне шынайы берілген тұлға. Оның бойындағы тәртіп, жауапкершілік және ұқыптылық – қызмет сапасының жоғары деңгейде болуына ықпал ететін негізгі қасиеттерінің бірі.
Қызметтен тыс уақытта ол – шығармашылыққа жақын жан. Қолөнермен айналысып, тігін тігу, тұрмысқа қажетті бұйымдарды өз қолымен жасау – оның ішкі әлеміндегі сабыр мен үйлесімділікті көрсетеді. Тоқыма тоқу арқылы ол тек әсемдікке ұмтылып қана қоймай, ой тыныштығын табады. Бұл қасиеттер оның күрделі қызметтік міндеттерді де байыппен, салқынқанды түрде шешуіне әсер етеді.
Сонымен қатар Жұлдыз тарихи әдебиеттерді оқуға ерекше қызығушылық танытады. Өткенді тану арқылы бүгінгі басқару мен ойлау жүйесін терең түсінуге ұмтылуы – оның интеллектуалдық деңгейінің кеңдігін айқындайды. Оның ерекше әуесқойлығының бірі – әлемнің әртүрлі елдерінен жиналған сувенирлік тәрелкелерді қабырғаға жинау. Бұл оның түрлі мәдениеттерге деген қызығушылығын, әлемге ашық көзқарасын және саяхат пен жаһандық кеңістікті бағалай білетінін көрсетеді.
Отбасында ол – екі қыздың мейірімді анасы. Отбасы мен қызметті қатар алып жүруі – оның өмірлік тәртіп пен ішкі тепе-теңдікке негізделген ұстанымының көрінісі. Жолдасы да ішкі істер органдарында ұзақ жыл қызмет етіп, бүгінде полковник шеніндегі ардагер ретінде құрметке ие тұлға.
Ол – бүгінгі полиция қызметінің жаңа бейнесін қалыптастырып жүрген буын өкілдерінің бірі, әрі өз ісіне адалдық пен жоғары мәдениеттілікті серік еткен маман.
