Жамбыл облысы бойынша қылмыстық-атқару жүйесі департаментіне қарасты Тараз қалалық №1 пробация бөлімінің қызметкерлері "Қауіпсіз үй" жедел-профилактикалық іс-шарасы аясында есепте тұрған тұлғалардың тұрғылықты мекенжайларына рейдтік тексеру жұмыстарын жүргізді, - деп хабарлайды Polisia.kz.
Іс-шара барысында кәмелетке толмаған сотталғандардың және жазаны өтеу кейінге қалдырылған тұлғалардың тұрғылықты жеріне барып, олардың тұрмыстық жағдайы зерделенді. Сонымен қатар, сот жүктеген міндеттер мен белгіленген талаптардың сақталуына назар аударылып, есепте тұрған азаматтармен профилактикалық-түсіндіру жұмыстары жүргізілді.
Рейдтік іс-шараның негізгі мақсаты – құқық бұзушылықтардың алдын алу, пробация есебінде тұрған тұлғалардың мінез-құлқына бақылауды күшейту, олардың белгіленген міндеттерді орындауын қадағалау, сондай-ақ кәмелетке толмағандардың құқыққа қайшы әрекеттерге баруына жол бермеу.
Тексеру барысында азаматтарға заң талаптарын сақтау, қоғамдық тәртіпті бұзбау, құқық бұзушылықтарға жол бермеу және өздеріне жүктелген міндеттерді уақтылы орындау қажеттігі түсіндірілді. Әсіресе, кәмелетке толмағандардың бос уақытын тиімді ұйымдастыру, олардың тәрбиесіне көңіл бөлу және қайталама құқық бұзушылықтардың алдын алуда отбасының жауапкершілігіне ерекше назар аударылды.
Пробация қызметінің жұмысы тек есепте тұрған тұлғаларды бақылаумен шектелмейді. Оның маңызды бағыттарының бірі – құқық бұзушылықтардың алдын алу, азаматтарға заң талаптарын түсіндіру және олардың қоғамға бейімделуіне ықпал ету. Осы ретте тұрғылықты мекенжайлар бойынша жүргізілетін рейдтік тексерулер есепте тұрған тұлғалармен тікелей байланыс орнатуға, олардың әлеуметтік-тұрмыстық жағдайын бағалауға және профилактикалық жұмыстың тиімділігін арттыруға мүмкіндік береді.
"Қауіпсіз үй" жедел-профилактикалық іс-шарасы аясындағы жұмыстар алдағы уақытта да жалғасып, құқық бұзушылықтардың алдын алуға, қоғамдық қауіпсіздікті қамтамасыз етуге және азаматтардың заң талаптарын сақтау жауапкершілігін арттыруға бағытталады.
