Рудный қаласының полиция қызметкерлері пәтерден 10 миллион теңгеден астам қаржыны қолды қылған ұрылардың жолын кесті, – деп хабарлайды Polisia.kz.
Оқиға үй иелері жоқ кезде болған. Полицияға шағым айтқан арыз иесінің айтуынша, 7 наурызда ол отбасымен бірге Қарабалық ауданына қыдырып кеткен. Қонақтан келген қожайын үйіне кіргенде шашылып жатқан заттарды көреді.
Шкаф пен сейфте 4500 АҚШ доллары, 6 миллион теңге және 500 мың Ресей рублі болған. Ұрылар түгел үптеп кетіпті.
Полиция қызметкерлері 100-ден астам пәтерді аралап, бейнекамералардың жазбаларын қарап, жүргізушілерден, сондай-ақ жәбірленушілердің таныстарынан және есепке алынған адамдардан сұрастырды.
Жүргізілген жұмыстың нәтижесінде, полиция қызметкерлері жедел іздестіру іс-шаралары барысында бұрын сотты болған Рудный қаласының үш тұрғынын ұстады.
Ақша гараждардың бірінде тәркіленді.
Қазіргі уақытта ҚР Қылмыстық кодексінің 188-бабының 4-бөлігі «Аса ірі мөлшерде жасалған ұрлық» бойынша сотқа дейінгі тергеу жүргізіліп жатыр.
