Атырау облысында ата-аналар мен ұстаздардың қатысуымен қашықтықтан оқыту жағдайында оқушылардың құқықтық қорғалуы мен олардың қауіпсіздігі мәселелеріне арналған онлайн кеңес өткізілді, – деп хабарлайды Polisia.kz.
ZOOM платформасы арқылы өткен жиынға Атырау облысы Полиция департаментінің Жергілікті полиция қызметі басқармасының ерекше тапсырмалар жөніндегі аға инспекторы Орынгүл Кушкалиева мен № 19 Қ.Сәтпаев атындағы мектеп-гимназияның ата-аналар комитетінің төрағасы Айбек Файзуллин қатысты.
Басты мәселе – оқушылардың сабаққа себепсіз қатыспауына жол бермеу, олардың қауіпсіздігін қамтамасыз ету, тұрмыстық зорлық-зомбылықтың алдын алу мақсатында мектеп әкімшілігі мен ата-аналардың, сондай-ақ мектеп инспекторларының бірлесіп жұмыс атқаруы болып табылады.
Айта кетейік, 2020 жылдың 11 айында Атырау облысында жасөспірімдер 63 қылмыс жасады, бұл көрсеткіш өткен жылмен салыстырғанда 8,6%-ға төмендеген.
Сондай-ақ кәмелетке толмағандарға қарсы 59 қылмыс жасалған, бұл көрсеткіш өткен жылмен салыстырғанда 10%-ға азайған.
2020 жылдың 11 айында ішкі істер органдарының профилактикалық есебіне барлығы 132 жасөспірім есепке қойылған.
Бұдан басқа “Қолайсыз отбасы” санатында 352 бала тәрбиеленетін 173 отбасы бар.
