Мақтааралдық полицейлер қайырымдылық жасады, – деп хабарлайды Polisia.kz.
Мақтаарал аудандық полиция бөлімінің қызметкерлері кіріп келген 2021 Жаңа жылды ізгі істермен, қайырымдылық жасаумен бастауға ниеттенді. Осылайша арнайы бір қошқарды құрбандыққа шалды. Құрбандыққа шалынған қойды үш бөлікке бөліп, етін және қосымша азық-түлік өнімдерін қосып жағдайы төмен, толық емес отбасыларға үлестіріп берді. Яғни Мақтаарал ауданының бірнеше отбасыларына барып жағдайларын сұрап, мерекелерімен құттықтады.
Өз кезегінде көпбалалы аналар қайырымды қызметкерлер атанған тәртіп сақшыларына алғыстарын жаудырып, ақ тілектерін білдірді.
– Сіздерге үлкен рақметімді айтқым келеді. Қыс ауасында күнделікті бірінші кезекте тұтынатын азық-түліктермен қамтып жатқандарыңызға! Жұмыстарыңызға табыс тілеймін! Жаңа жыл жақсылығын алып келсін!, – деп шынайы ризашылықтарын жеткізді.
Айта кетер жайт осындай игі іс-шараларды Мақтаарал аудандық полиция бөлімі ай сайын ұйымдастырып тұрады.
Қашанда қолдан келгенше қайырымдылық жасауды өздеріне парыз еткен ел қорғандары, жақсылық жасау — имандылықтың, тәрбиеліліктің, парасаттылықтың айқын көрінісі деп біледі. Мейірімділік пен қамқорлыққа бастайтын шарада аудан полицейлері бірауыздан келісіп, өзгелерге қолдан келгенше көмектесуді қолға алған. Бұл іс-шара жеке құрамның халықпен тығыз байланыста болуына бастайды.
