Қарағандыда ұры 90 жастағы тұрғынының металл гаражын қолды қылды, – деп хабарлайды Polisia.kz.
22 қыркүйекте 90 жастағы қала тұрғыны Қарағанды қаласының ПБ Орталық полиция бөліміне жүгінген. Ол белгісіз біреудің темір гаражды ұрлап кеткенін айтты. Онда үш доңғалақ пен құрылыс материалдары болған. Келтірілген шығын көлемі 750 мың теңгені құрады.
Гараж көпқабатты үйдің жанында орналасқан болып шықты. Түнгі уақытта гаражды жүк көлігіне тиеп, алып кеткен. Мұны қылмыс орнында қалдырылған шинаның табанының іздері дәлелдейді. ҚР ҚК 188-бабы (Ұрлық) бойынша қылмыстық іс қозғалды.
5 қазанда жедел-іздестіру шаралары барысында криминалдық полиция қызметкерлері күдікті – 30 жастағы ер адамды анықтап, ұстады. Ол қылмысын мойындады. Айғақты зат – металл гараж тәркіленді.
Сотқа дейінгі тергеу барысында полицейлер күдіктінің осыған ұқсас тағы бір қылмысқа қатыстылығын анықтады.
