Абай облысы полиция департаменті Аягөз ауданы полиция бөлімінің көші-қон қызметі қызметкерлері қаржылық міндеттемелерін орындаудан жалтарып жүрген борышкерлерді анықтау жұмыстарын белсенді түрде жалғастырып жатыр, – деп хабарлайды Polisia.kz.
Осындай іс-шаралардың бірінде алимент төлеуден ұзақ уақыт бойы жалтарған 44 жастағы азамат анықталды. Оның жалпы қарызы шамамен 1,8 млн теңгені құрады. Жедел-іздестіру шаралары барысында полиция қызметкерлері оның Алматы қаласында жүргенін анықтады. Енді қарызды өндіру бойынша одан әрі шараларды сот орындаушылары жүргізеді.
Айта кету керек, биылғы жылы Абай облысы көші-қон қызметінің бөлімшелері 44 борышкерді анықтады. Олардың арасында тек алимент төлемеушілер ғана емес, салық төлеуден жалтарғандар және материалдық шығынды өтеуден бас тартқандар да бар.
Полицейлер осындай азаматтарды анықтау бойынша тұрақты түрде іздестіру іс-шараларын жүргізеді, өйткені олардың қарызы тек мемлекеттің мүддесіне ғана емес, сондай-ақ нақты адамдар мен отбасылардың тағдырына да әсер етеді.
Полиция қызметкерлері азаматтарға қаржылық міндеттемелерін уақытылы орындаудың маңыздылығын ескертеді, себебі алимент пен басқа да төлемдерді төлеуден жалтару шетелге шығу шектеулеріне және сот арқылы қарызды мәжбүрлеп өндіруге дейінгі ауыр құқықтық салдарға әкелуі мүмкін.