Алматыда полиция қызметкерлері Халық Қаһарманы Ғазиз Байтасовты еске алды, – деп хабарлайды Polisia.kz
Еске алу іс-шарасы Ғазиз Байтасовтың ескерткіші мен ішкі істер органдарының қаза тапқан қызметкерлеріне арналған ескерткішке гүл қою рәсімінен басталды.
Оған ПД қызметтері мен бөлімшелерінің 100-ден астам қызметкерлері, оның ішінде жас полицейлер де қатысты.
– Ғазиз Байтасов – Отанға аянбай қызмет етудің жарқын үлгісі. Оның халықты құтқару жолындағы ерлігі еліміздің тарихына мәңгілік жазылып, ұрпақтан-ұрпаққа мол мұра ретінде жалғасады. Біздің қасиетті борышымыз – бейбіт заманда қылмыспен ымырасыз күресте жанын қиған әріптестерімізді еске алу, – деді Алматы қалалық Полиция департаментінің бастығы Арыстанғани Заппаров.
Еске алу рәсімінен кейін шаһар полициясының бастығы жас қызметкерлермен ерлік сабағын өткізді.
Патриоттық сабақ аясында тәртіп сақшыларының жаңа буыны Алматы қалалық ПД мұражайында болып, Қазақстан полициясының тарихынан сыр шертетін экспозициялармен танысты.
