Алматыда полиция профилактикалық шараларды күшейтті, — деп хабарлайды Polisia.kz.
Профилактика жылы аясында “Сайран” көлінің жағалау аймағында қоғамдық қауіпсіздікті және құқықтық тәртіпті қамтамасыз ету мақсатында Алматы қаласы полиция департаментінің басшылығы Алмалы және Әуезов аудандары әкімдері, сондай-ақ мердігер компания өкілдерінің қатысуымен көшпелі жұмыс кеңесі өтті.
Кездесуде қаланың ең көп келетін демалыс орындарының бірінде қауіпсіздікті қамтамасыз ету, жақсарту және құқық бұзушылықты бақылау мәселелері талқыланды.
Жақын арада екі модульдік полиция бекетін орнату, сондай-ақ құқық бұзушылықтарды жедел анықтауға және алдын алуға мүмкіндік беретін, жағалау аймағын патрульдеу үшін дрондарды пайдалану жоспарлануда.
Сондай-ақ жағаның периметрі бойынша Алматы қалалық ПД жедел басқару орталығына дабыл беретін бейнебақылау камералары орнатылады.
Соңғы екі аптада полиция қызметкерлері түрлі қоғамдық тәртіпті бұзған 120-дан астам адамды жауапкершілікке тартты.
Сонымен қатар азаматтарды демалыс аймағына ұқыпты қарауға баулу мақсатында тұрғындармен кездесулер өткізу, ақпараттық парақшалар тарату, әлеуметтік жарнамаларды орналастыру жоспарлануда.
— Біз Сайран көлін тұрғындардың демалатын жері ғана емес, құқық бұзушылықтың алдын алуда үнемі назарда болатын нысан ретінде қарастырамыз. Мұндағы қауіпсіздік пен тәртіп — біздің ортақ міндетіміз. Полицейлер әкімдікпен және мердігерлермен бірлесіп, бақылауды қамтамасыз етеді, бірақ тұрғындардың өздері де қатысуы маңызды, — деді Алматы қалалық полиция департаменті.
