Алматыда мобильді экопатрульдер жұмыс істейді, – деп хабарлайды Polisia.kz.
Алматыда жыл басынан бері экологиялық нормаларды бұзу бойынша 7700-ден астам дерек анықталды. Сонымен қатар Алматыда 19 жаңа үлгідегі стационарлық табиғатты қорғау бекеті жұмысын жалғастыруда. Бұл бекеттерде патрульдік полиция полкінің инспекторлары мен экологтар арнайы құрылғылар арқылы көліктерден шыққан түтін деңгейін бақылайды.
Стационарлық бекеттерден бөлек, өткен жылдан бастап қалада нақты уақыт режимінде көліктердің шығарындыларын бақылайтын жылжымалы экопатрульдер жұмыс істейді. Бұл патрульдер тек бекеттерде ғана емес, көлік ағынында да тәртіп бұзушыларды анықтап, жедел шаралар қабылдауға мүмкіндік береді.
- Экопатрульдердің жұмысы қаладағы экологиялық жағдайды жақсарту жолындағы маңызды қадам болып табылады. Біз ауаның ластануын азайту мақсатында шығарындыларды бақылауды күшейттік. Біздің міндетіміз – заң бұзушылықтарды анықтау ғана емес, сондай-ақ жүргізушілерде қала экологиясына жауапкершілікпен қарауды қалыптастыру, – деді Алматы қалалық ПД жергілікті полиция қызметі басқармасының бастығы Серік Шумаев.
Шумаевтың айтуынша, жыл басынан бері табиғатты қорғау бекеттері мен экологиялық патрульдерде 7 704 заң бұзушылық анықталды. Сонымен қатар 2025 жылдың 13 наурызындағы жағдай бойынша заңнамаға өзгерістер енгізілгенін атап өтті: енді зиянды шығарындылар нормаларын бұзу ескертумен шектелмейді, оған 10 АЕК көлемінде айыппұл қарастырылған.
