Қазақстан полициясының 30 жылдығына орай Polisia.kz. редакциясы Отанына адал қызмет етіп, ел қорғаны болып жүрген полицейлер туралы ақпарат ұсынбақ.
23 маусым – Қазақстан полициясы күні. Ақмола облысы полиция департаментінде және оның аумақтық бөлімшелерінде Қазақстан полициясының құрдастары қызмет атқарады. Солардың бірі – Ақкөл аудандық полиция бөлімінің анықтаушысы, полиция капитаны Алена Тарасенко. Алена өз жұмысы туралы айтып берді.
Ол 1992 жылы 2 маусымда Ақкөл қаласында дүниеге келген. 2010 жылы Ақкөл қаласындағы №1 орта мектепті бітірді. Аленаның айтуынша, ол бала кезінен полицияда жұмыс істеуді армандаған.
– Мен 16 жасымда органда жұмыс істеймін деп шештім. Әрдайым полиция формасын кигім келетін. Менің ойымша, бұл әдемі ғана емес, сонымен бірге өте жауапты.
Аленаның анасы – мектепке дейінгі білім беру мұғалімі, әкесі – дәнекерлеуші. Ата-анасы қызының таңдауына құрметпен қараған, үлкен ағасы да қолдаған. Мектепті бітіргеннен кейін ол Қостанай қаласындағы Челябі мемлекеттік университетінің филиалына оқуға түсті. Заң факультетінде оқыған. 2016 жылы университетті бітіргеннен кейін ішкі істер органдарына қызметке тұрды. Есіл ауданының полиция бөлімінде анықтаушы болып жұмыс істеді. 2021 жылы ол туған қаласы Ақкөл қаласына оралып, қазіргі уақытта сонда қызмет атқаруда.
– Орын алған жол-көлік оқиғасына алғашқы шығуым өмір бойы есімде қалатын шығар. Есіл ауданында ЖКО бір отбасының бірден екі мүшесінің өмірін қиды. Ер адам мен қыз оқиға орнында қаза тапты. Тек әйел тірі қалды. Жол жиегінде қайтыс болған ер адамның әкесінің қайғыдан қиналған жүзі әлі есімде. Ол қолында кішкентай немересінің қанды киімін ұстап тұрды. Бұл естеліктер әлі күнге дейін есімде, – дейді анықтаушы Алена.
Анықтаушылар қызметінің негізгі міндеті – онша ауыр емес және ауырлығы орташа қылмыстарды ашу. Жауап алуды жүзеге асыру, оқиға орнына бару, беттестіру – мұның бәрі погон таққан ханымның күнделікті қызметтік міндеттері.
– Мамандығымыз үлкен қайтарымды талап етеді. Мен барлығына үлгеріп, қыздарымды назардан тыс қалдырмауға тырысамын. Мен мамандық таңдауымда ешқашан өкінген емеспін. Жұмыс өміріміздің көп бөлігін алады. Сондықтан жүрегіңізге жақын мамандықты таңдау керек. Патриотизм, заңды, азаматтың ар-намысы мен қадір-қасиетін терең құрметтеу, жоғары адамгершілік сана, моральдық нанымдардың беріктігі – қазіргі заманғы тәртіп сақшысының құндылықтары. Менің ойымша, осындай болуы тиіс, – деп қорытындылады анықтаушы Алена.
