Ақтөбе Заң институтының 1-курс курсантарының, жас қызметкерлердің және “Жас сақшы” полиция сыныбының тәрбиеленушілерінің ант қабылдау рәсімі өтті, – деп хабарлайды Polisia.kz.
Ауқымды іс-шараға ІІМ әкімшілік полиция комитетінің төрағасы Қайсар Сұлтанбаев, жергілікті атқарушы органның басшылары, қоғам белсенділері, институт ардагерлері, БАҚ өкілдері мен ата-аналар қатысты.
Қонақтар алдымен М.Бөкенбаевтың рухына тағзым етіп, ескерткішіне гүл шоқтарын қойды. Батырға 1 минут үнсіздікпен құрмет көрсетті.
Шараның негізгі бөлімінде институттың жас офицерлері, курсанттар, кадеттер елімізді, Отанымызды сүйетін, қазақ елінің айбынды азаматы, нағыз патриоты болуға ант етті.
Институт бастығы Н.Мұхаметқалиев жас сақшыларға анттарына адал болып, халық үшін адал қызмет атқаратын білімді де саналы, ел сенімін ақтайтын ұрпақ болуларына тілектестік білдірді.
Сонымен қатар курсанттардың ата-аналары жүрекжарды ақ тілегін арнап, жарқын болашақ тіледі. Салтанатты жиында балалар ансамблі ән шырқап, тыңдаушылардан құралған арнайы жасақ жауынгерлік ұрыс тәсілдерінен қойылым ұсынды.
Қонақтар институттың мұражайын, мультимедиялық студиясын, криминалистикалық полигонын, казармасын көріп, курсанттардың, тыңдаушылардың тыныс-тіршілігімен танысты. Сондай-ақ олар Кеңес Одағының батыры М.Бөкенбаевқа арналған мұражайда экспонаттарды тамашалап, рухани әсер алды.
Ант қабылдау салтанатына еліміздің әр өңірінен келген ата-аналар ұл-қыздарымен қауышып, қуанышты сәтке ортақ болды.
