Ақтөбеде бес мыңнан астам жасөспірім түрлі құқық бұзушылықтар мен қылмыстар үшін полицияға жеткізілді, – деп хабарлайды Polisia.kz.
Жасөспірімдер қылмысының алдын алу мақсатында Ақтөбе облысының аумағында «Түнгі қаладағы балалар», «Қадағалаусыздық», «Демалыс», «Жасөспірім», «Жасөспірім және заң», «Жасөспірім» Республикалық жедел алдын алу іс-шаралары, «Қайыршы», «Отбасы» акциялары өткізіледі, сондай-ақ тұрақты негізде жергілікті рейдтік жұмыстар жүргізілді.
Жоғарыда көрсетілген іс-шараларды өткізу барысында түрлі құқық бұзушылықтар мен қылмыстар үшін ішкі істер органдарына кәмелетке толмаған 5 118 бала, оның ішінде әкімшілік құқық бұзушылықтар жасағаны үшін кәмелетке толмаған 4 727 бала жеткізілді. Кәмелетке толмағандардың заңды өкілдерінің еріп жүруінсіз тұрғын үйден тыс жерде болғаны үшін 4 223 ата-ана жауапқа тартылды.
Ал халыққа құқықтық көмек көрсету мақсатында кәмелетке толмағандардың істері жөніндегі учаскелік, мектеп инспекторлары бұқаралық ақпарат құралдарында, сондай-ақ оқу орындарының ата-аналарымен, оқушыларымен үнемі профилактикалық әңгімелер жүргізді.
Ақтөбе облысының Полиция департаменті ата-аналарға кәмелетке толмаған балаларды тиісті тәрбиелеу, бақылау қажеттілігі туралы ескертеді. Балаңыздың достарымен байланысын бақылаңыз, балаңыздың ұялы телефонын тексеріңіз, балаңыздың қандай сайттарға кіретінін біліңіз.
