Атырауда 24 млн теңгенің есірткісін сатпақ болған дәстүрсіз діни ағым өкілдері ұсталды, – деп хабарлайды Polisia.kz.
«Карасора-2021» жедел алдын алу іс-шарасы аясында Атырау облысы Полиция департаменті Экстремизмге қарсы іс-қимыл және Есірткі қылмысына қарсы іс-қимыл басқармасының қызметкерлері Атырау қаласы аумағында Орал қаласынан келіп синтетикалық есірткі сатпақ болған 1998 және 1999 жылы туған екі күдіктіні ұстады.
Ұсталған кезде күдіктілерден синтетикалық есірткі бар зип пакеттеріне оралған 46 түйір табылды. Және олардың жалға алған пәтерінен екі пакетке оралған синтетикалық есірткі заты мен 100 дана дайын бетбелгі тәркіленді. Нәтижесінде жалпы сомасы 24 млн теңгеге жуық синтетикалық есірткінің 2 400 бір реттік дозасы заңсыз айналымға жіберілмеді.
Аталған факт бойынша ҚР Қылмыстық кодексінің 297-бабы 3-бөлігі бойынша тергеу амалдары жүргізілуде. Қазіргі таңда күдіктілер соттың санкциясымен Атырау қаласының тергеу изоляторына қамалды.
