Атыраулық полицейлер «Қару» жедел-профилактикалық іс-шарасы аясында тіркелмеген 9 қару тәркіледі, – деп хабарлайды Polisia.kz.
Атырау қаласында 7 ақпаннан бастап «Қару» жедел-профилактикалық іс-шарасы қарқынды өтуде.
Іс-шараның басты мақсаты – азаматтық қару айналымы саласына тиімді мемлекеттік бақылауды жүзеге асыру.
Осы ретте Атырау қаласы Полиция басқармасының азаматтық қызметтік қару айналымының бақылау тобының қызметкерлері мен учаскелік полиция инспекторлары 3 290 қару иесін мекенжайлары бойынша тексерді. Қаруды сақтау және тіркеу ережелерін бұзған 120-ға жуық адам жауапкершілікке тартылды.
Тәртіп сақшылары 88 адамды ҚР ӘҚБтК-нің 484-бабымен (Азаматтық, қызметтік, марапаттық, коллекциялық қаруды, оның патрондарын иелену, беру, есепке алу, сақтау, пайдалану, тасымалдау, ҚР-ның аумағына әкелу, ҚР-ның аумағынан әкету және ҚР-ның аумағы арқылы транзитпен өткізу тәртібін бұзу) жауапқа тартты, сондай-ақ 31 тұлғаны ҚР ӘҚБтК-нің 486-бабымен (Азаматтық, қызметтiк, марапаттық, коллекциялық қаруды тiркеу (қайта тiркеу) не оны есепке қою тәртібін бұзу) әкімшілік жауапкершілікке тартты.
Шара аясында тіркелмеген тоғыз қару тәркіленіп, бір адам өз еркімен қару тапсырды.
