Түркістан облысының полицейлері 17 000-нан астам көлік пен 44 000-ға жуық жолаушыны тексерді, – деп хабарлайды Polisia.kz.
Коронавирустың алдын алу мақсатында Түркістан облысында кешенді қауіпсіздік шаралары жүргізіліп жатыр. Солардың негізгісі ретінде 18 наурыздан бастап Алматы және Қызылорда бағытындағы шекаралық аймақтарындағы «Сауран» және «Шақпақ» бекеттерінде короновирус дертіне байланысты тәулік бойы жұмыс істейтін блок-бекеттер қойылғанын атап өтуге болады. Жалпы, Түркістан облысы бойынша 30 блок-бекеттер іске қосылған. Бұл бекеттерде полицейлер және медицина мамандары әрбір көлікті тоқтатып, арнайы құрылғымен азаматтардың дене қызуларын өлшеп, тексерістен өткізіліп жатыр.
Одан бөлек әлеуметтік, кәсіпкерлік нысандар мен адам көп жиылатын қоғамдық орындардың жұмыс жасау режимі өзгертіліп, шектеулер қойылды. Алдын алу шараларының барлығында Түркістан облысы Полиция департаменті қызметкерлері қарқынды жұмыс жасап, күшейтілген
қызметке кіріскен.
Түркістан облысы ПД Жергілікті полиция қызметі ППБ-ны қызметкерлері республикалық маңызы бар автожолдардарда қызметтік көліктерімен жұмылдырылып, жедел әрекет етеді. Республикалық маңызы бар жолдарда орналасқан «Сауран», «Шақпақ» блок-бекеттерінде 26.03.2020 жылғы есеп бойынша 17 000-нан астам көліктер және 44 000-ға жуық жолаушылар тексерілген. Аталған аймақтарда полицейлер сағат сайын бақылау жасап, кезекшілікпен қызмет атқарып жатыр.
Осы тұста облысымыздың әрбір тұрғынына төтенше жағдайға байланысты адамдар көп шоғырланатын той-жиындар, кішігірім отырыс, іс-шараларды тоқтата тұрып, үйден шықпауға және мүмкіндігінше барлық қауіпсіздік талаптарын сақтауға шақырамыз.
