Ақмолада екі жігіт сатушыға жалған чек көрсетіп, тауарды алып кеткен, – деп хабарлайды Polisia.kz.
2 сәуірде Степногорск қаласының Полиция басқармасына 50 жастағы жергілікті тұрғыннан 28-29 наурыз аралығында дүкендердің бірінде белгісіз тұлғалар азық-түлікті алдау жолымен иемденгені туралы өтініш келіп түсті. Шығын сомасы 66 883 теңгені құрады. Жетіспеушілік тексеру кезінде анықталды.
Жедел-іздестіру шаралары барысында күдіктілердің жеке басы анықталды. Степногорск қаласының 24 жастағы тұрғыны және оның досы Павлодар облысының 20 жастағы тұрғыны екі күн ішінде азық-түлік сатып алған дүкенге 7 рет барған. Қаскүнемдер Telegram-боттың көмегімен ақша аудару туралы жалған чектер жасап, төлем жасау қажет болған кезде дүкенде көрсеткені белгілі болды.
190-баптың 2-бөлігі (Алаяқтық) бойынша сотқа дейінгі тергеу жүргізілуде. Қазіргі уақытта аталған азаматтардың басқа да осындай қылмыстарды жасауға қатыстылығы тексерілуде.
