Елордада инвестицияға 10 млн теңге салған азамат алаяқтың құрбаны болды, – деп хабарлайды Polisia.kz.
Алматы аудандық полиция басқармасына елорда тұрғыны арызданып, алаяқтықтың құрбаны болғанын хабарлаған.
Жәбірленушінің айтуынша, ол таңертең сауда үйінің автотұрағында таныс әйелге 10 млн теңге берген. Белгілі болғандай таныс әйел өзін желілік маркетинг бойынша кеңесші ретінде көрсете отырып, кейіннен жоғары пайда түсетініне сендіріп, ақшаны инвестициялауға көндірген. Астана тұрғыны жоғары төлемдерді күтпестен, сенімсіз болып, полицияға жүгінуге мәжбүр болған.
Жедел іздестіру шаралары барысында жедел уәкілдер алаяқтықпен айналысты деген күдікпен 38 жастағы әйелді анықтаған.
Қазіргі уақытта аталған факті бойынша ҚР Қылмыстық кодексінің 190-бабы (Алаяқтық) бойынша сотқа дейінгі тергеу амалдары жүргізіліп жатыр.
Аталған азаматша алған ақшасын ысырап етіп, керегіне жұмсап үлгергені де белгілі болған. Ол қылмыс жасағанын мойындап, оның елордада бұрын жасалған осыған ұқсас фактілерге қатыстылығы анықталып жатыр.
