Бүгін Ішкі істер министрлігінде нашақорлық пен есірткі бизнесіне қарсы іс-қимылға бағытталған мемлекеттік органдардың қызметін үйлестіру жөніндегі ведомствоаралық штабтың отырысы өтті, – деп хабарлайды Polisia.kz.
Штаб жұмысының барлық кезеңінде алғаш рет, 2011 жылдан бастап, Кеңес барынша кеңейтілген құрамда өтті. Оған әкімдер мен барлық орталық мемлекеттік органдардың басшылығы қатысты. Бұған нашақорлыққа және есірткі бизнесіне қарсы күрес жөніндегі Кешенді жоспардың жобасын әзірлеу мәселесі себеп болды. Құжатты әзірлеуді Үкіметке мемлекет басшысы тапсырды.
Ішкі істер министрі Марат Ахметжанов кіріспе сөзінде әлемде болып жатқан жаһандық геосаяси процестерді ескере отырып, есірткі ахуалын дамытудың негізгі бағыттарын атап өтті. Есірткі саясатын мемлекеттік реттеу векторлары анықталды.
Нашақорлық пен есірткі бизнесіне қарсы күрестің кешенді жоспарының жобасы үш негізгі бағыт бойынша күш-жігерді үйлестіруді көздейді.
Бірінші бағыт – есірткіні бақылау тетігін жетілдіру: жаңа психоактивті заттарды мемлекеттік бақылауға қою рәсімін оңайлату, күшті дәріхана препараттарын тарату проблемасын шешу, есірткі тұтынушыларға объективті статистика қалыптастыру.
Жақын арада Қазақстанда шетелдік интернет-провайдерлердің өкілдіктерін ашу бойынша атқарылған жұмыстар жеке атап өтілді. Бұл мессенджерлердегі есірткі сайттары мен чаттарды анықтау және бұғаттау жөніндегі жұмысты жандандыруға мүмкіндік береді.
– Әрбір интернет-дүкеннің артында есірткі сатушылар, курьерлер, есірткі жасырушылар желісі бар қылмыстық топтар тұр. Басқаша айтқанда, бұл “сандық есірткі”. Сондықтан осындай бір электрондық ресурсты жою жүздеген өмірді құтқарады, – деп атап өтті Марат Ахметжанов.
Екінші бағыт – мемлекеттік органдарды, әсіресе, сот сараптамасы институттары мен денсаулық сақтау органдарын материалдық-техникалық жарақтандыру.
Үшінші бағыт – нашақорлықтың алдын алуды ұйымдастыру. Әзірленіп жатқан құжаттың көп бөлігі осы мәселені шешуге арналған. Ол есірткіні тұтынудың бастапқы алдын алуды, есірткіні тұтынушыларды барынша анықтауды және оларды емдеу мен оңалтуға ынталандыруды, жастарды есірткіні тұтынуға немесе есірткінің заңсыз айналымына қатысуға итермелейтін себептерді болдырмауды қамтиды.
Осы бағытты іске асыру үшін жергілікті атқарушы органдардың қызметіне үлкен мән беріледі. Үкіметтік емес сектордың қатысуымен бірқатар іс-шаралар жоспарланған. Ол үшін кешенді жоспарды дайындау жөніндегі жұмыс тобына нашақорлықтың және АИТВ-ның (ЖИТС) алдын алу мен емдеу саласында жұмыс істейтін қоғамдық ұйымдар енгізілді.
