Маңғыстау облыстық ҚАЖД мекемесінде адам құқықтары бойынша іс-шара ұйымдастырылды, – деп хабарлайды Polisia.kz.
Маңғыстау облысы бойынша ҚАЖД №43 мекемесінде 10 желтоқсан – Адам құқықтары күніне орай іс-шара өтті. Шараны мекеме бастығының орынбасары Азат Шабиков жүргізді.
Мекемеде жазасын өтеушілермен ҚР Адам құқықтары жөніндегі уәкілдің Маңғыстау облысы бойынша өкілі Аслан Қужиев кездесті. Кездесудің мақсаты – құқықтық сауатын арттыру, адам құқықтарын сақтау мәдениетін дамыту және жазасын өтеушілермен ашық жұмыс жүргізуді қамтамасыз ету. Іс-шара барысында бейнеролик көрсетілді.
Кездесу барысында мекеме қызметкерлері дискриминацияға жол бермеу қағидаттары, заңдылық кепілдіктері, құқық қорғау органдарына жүгіну механизмдері және өтініштерді қарау тәртібі туралы түсіндірді.
Қатысушыларға адам құқықтарының жалпыға бірдей декларациясындағы негізгі ережелер және жазасын өтеушілердің құқықтарын қорғауға қатысты ұлттық нормалар еске салынды.
Негізгі назар бұзушылықтардың алдын алу, мекеме персоналының қауіпсіз орта қалыптастырудағы рөлі және әкімшілік пен арнайы контингент арасындағы конструктивті диалогты сақтау мәселелеріне аударылды.
Мұндай кездесулер құқықтық мәдениетті қалыптастыруға және адам құқықтарын қорғау институттарына деген сенімді нығайтуға ықпал етеді.
