Нұр-Сұлтан полицейлері кіреберістен велосипед ұрлаған күдіктіні ұстады, – деп хабарлайды Polisia.kz.
Полицияға қала тұрғыны Қажымұқан көшесіндегі үйдің кіреберісінен белгісіз біреу оның құны 85 мың теңге тұратын велосипедін ұрлап кеткенін айтып арызданған.
Нұр-Сұлтан қаласы Полиция департаментінің «Алматы» аудандық ПБ криминалдық полиция қызметкерлері жедел-іздестіру іс-шараларын жүргізу кезінде ұрлық жасаған күдіктіні ұстады. Ол 25 жастағы қала тұрғыны болып шықты. Тергеу барысында анықталғандай, жігіт үйдің кіреберісінде тұрған велосипедті байқап қалып, жақын жерде ешкімнің жоқтығын пайдаланып, оны ұрлап ізін суытқан.
Аталған фактіге байланысты «Ұрлық» бабы бойынша сотқа дейінгі тергеу амалдары жүргізілуде. Ұсталған ер адамның елорда аумағында жасалған басқа да осыған ұқсас қылмыстарға қатыстылығы тексерілуде.
Нұр-Сұлтан қаласының Полиция департаменті қырағы болуға, велосипедтерді қараусыз қалдырмауға, ұрлыққа қарсы сапалы велосипед құлыптарын қолдануға кеңес береді.
