Шығыс Қазақстан облысының Өскемен қаласында жас жігіт біреудің қымбат бағалы көлігінің терезе әйнектерін және шамдарын сындырып, көлікке қасақана зақым келтірген, – деп хабарлайды Polisia.kz.
Бірнеше күн бұрын Өскемен қаласының ПБ Ертіс полиция бөлімінің «102» пультіне 33 жастағы қала тұрғыны жүгінді. Ол 3 ақпан күні сағат 06.20 шамасында белгісіз біреудің бұзақылық ниетпен үйінің ауласында тұрған «Lexus-470» автокөлігінің терезе әйнектерін, сондай-ақ артқы габариттік шамдарын сындырып кеткенін хабарлады. Қаскөйдің қылмыстық әрекеттерінің салдарынан жәбірленушіге 100 000 теңге көлемінде материалдық шығын келтірілген.
Жедел-іздестіру іс-шараларын жүргізу кезінде криминалдық полиция қызметкерлері осы қылмысты жасауға қатысы бар 21 жастағы жігітті анықтап, полиция бөліміне жеткізді.
Аталған факт бойынша ҚР ҚК-нің 293-бабының 1-бөлігімен (Бұзақылық) сотқа дейінгі тергеу амалдары жүргізілуде.
