Павлодарда орнатылған интеллектуалдық камералар мен жылдамдық өлшегіштермен 4600-ден астам жол қозғалысы ережелерін бұзу фактілері анықталды, – деп хабарлайды Polisia.kz.
Павлодар қаласының жолдары мен қиылыстарында жол апаттары мен жол қауіпсіздігінің алдын алу мақсатында заманауи техникалық құралдар орнатылды. Олардың бірі – жылдамдық өлшегіштер мен интеллектуалды камералар, олар жылдамдық, бағдаршамның қызыл жарығына өту және тоқтау сызығының қиылысы сияқты бұзушылықтарды анықтайды.
Жылдамдық өлшегіштердің жұмыс механизмі осындай: жол қозғалысы ережелерін бұзған кезде RedSpeed жүйесі үш сандық суретке түсіреді. Біріншісі – көлік құралының нөмірлік белгісінің үлкейтілген бейнесі, екіншісі – автомобильдің маркасын, моделін және түсін көрсететін жалпы бейнесі. Ақырында жүйе көлік құралының жылдамдығына пропорционалды уақытты тоқтатады және үшінші рет суретке түсіреді, бұл машинаның құқық бұзушылық кезінде қозғалыста болғанын дәлелдейді.
– Бүгінгі таңда Павлодар қаласында орнатылған интеллектуалдық камералар мен жылдамдық өлшегіштермен 4600-ден астам жол қозғалысы ережелерін бұзу фактілер анықталды, олар бойынша жалпы сомасы 20 млн теңгеге әкімшілік айыппұлдар салынды, – деп хабарлады Павлодар облысы Полиция департаменті бастығының бірінші орынбасары Жасқайрат Қайыров.
4 353 жүргізуші белгіленген қозғалыс жылдамдығын сақтамады, ол үшін ҚР ӘҚБтК-нің 592-бабы (Белгiленген жүру жылдамдығын арттыру) бойынша жауапкершілікке тартылды, 63-і тоқтау сызығынан өтті, ал 37 тұрғын бағдаршамның тыйым салынатын сигналына өткен, бұл жол қозғалысы ережелерін өрескел бұзудың бірі болып саналады және ауыр салдарға әкелуі мүмкін.
Бұзушыларға қатысты ҚР ӘҚБК 599-бабы (Бағдаршамның тыйым салатын сигналына немесе реттеушiнiң тыйым салатын қимылына қарамай өту) бойынша әкімшілік хаттамалар толтырылды. 10 АЕК көлемінде айыппұл салынды.
Полиция жүргізушілердің арасында осы жүйелермен бірнеше рет тіркелген көлік құралдары бар екенін айтады. Мысалы, Mitsubishi Outlander көлігінің жүргізушісі 61 мың теңге айыппұл алып, жол жүру ережесін үш рет елемеді.
