Түркістан облысының полицейлері желіде танымал жастармен кездесіп, меморандумға қол қойды, – деп хабарлайды Polisia.kz.
Бүгінгі күні әлеуметтік желі адамдар үшін ең маңызды дүниелердің бірі болып отыр. Онда өзінің атын қалыптастырып, жақсы жағынан танылып жүрген белсенді жастар өте көп, тиісінше олардың аудиториясы да баршылық. Мұны ескерген түркістандық полицейлер өңірде өз танымалдылығы бар жастармен кездесіп, дөңгелек үстел ұйымдастырды. Мұндағы негізгі мақсат – әлеуметтік желілерде танымал аккаунттар мен блогерлердің мүмкіндіктерін пайдалана отырып, халық арасында жол-көлік оқиғаларының алдын алу туралы ақпараттық-түсіндіру жұмыстарын бірлесіп жүргізу.
Қала жастары жиналған дөңгелек үстелде Түркістан облысы ПД Жергілікті полиция қызметі басқармасы бастығының орынбасары Бақытқали Кенжебаев пен ПД баспасөз хатшысы Гүлнар Абдужаппарова сөз алды. Спикерлер желі белсенділерін жол апаттарының алдын алу, жаяу жүргіншілердің қауіпсіздігін арттыру мақсатында «Біз жолдағы қауіпсіздік үшін» деген тақырыпта сұхбат өрбітті.
Жиынға арнайы келген блогерлер ұсыныс-пікірлерін жеткізіп, ашық әңгімелесу жүргізілді. Кездесу соңында желі қолданушылары мен полицейлер арасында алдағы уақытта бірлесіп жұмыс жасау үшін меморандумға қол қойылды.
Ал жастар болса, тұрғындардың амандығы үшін, яғни көлік жүргізушілері мен жаяу жүргіншілердің жол ережесін сақтауына азғантай да болса ой салып, қолдау білдіруге, қолдарынан келгенше жәрдем етуге тырысатындықтарын жеткізді. Сондай-ақ жол апаттарынан бөлек, жаяу жүргіншілер жолағынан өтуде де жастардың абай болуы үшін TikTok арқылы ескертулерді жариялау мақсатында дөңгелек үстелге жиналған жастар полицейлермен бірге рейдтерге шығуға уағдаласты.
