Полиция ақмолалықты пышақпен қорқытқан үш ер адамды ұстады, – деп хабарлайды Polisia.kz.
Ақмола полицейлері облыс орталығының тұрғынына жасалған қарақшылық шабуылды ашты. Қаскүнемдердің олжасы ұялы телефон болды.
27 тамызда Көкшетау қаласының Полиция басқармасына жәбірленушіден арыз келіп түсті. Ер адам Вернадский көшесіндегі “Темірлан” дүкені маңында белгісіз тұлғалар пышақпен қорқытып, одан Lenovo маркалы ұялы телефонын ашық ұрлап кеткенін хабарлады. Материалдық шығын сомасы 60 000 теңгені құрады.
Оқиға орнына келген жедел уәкілдер ықтимал куәгерлерді анықтау үшін аулаларды аралап, бейнебақылау камераларының жазбаларын зерттеді, жәбірленушіден жауап алды.
Жедел басқару орталығының қызметкерлері бейнебақылау камераларының жазбаларын зерделеу нәтижесінде қаскүнемдер жүріп келе жатқан автомашинаны, сондай-ақ автомобильдің жүру маршрутын орнатты.
Жедел-тергеу іс-шараларының кешені барысында 31-ден 48 жасқа дейінгі үш күдікті анықталып, ұсталды, олардың екеуі бұрын ҚК 297-бабы, 296-бабы, 191-бабы бойынша қылмыстық жауапкершілікке тартылды.
Қазіргі уақытта аталған факті бойынша ҚР ҚК 192-бабының 2-бөлігі (Қарақшылық) бойынша сотқа дейінгі тергеу басталды. Күдіктілер уақытша ұстау изоляторына қамалды.
