Қарағанды облысында малшы өзі баққан табынның үш сиырын иемденіп алған, – деп хабарлайды Polisia.kz.
16 сәуірде Нұра ауданының полиция бөліміне шаруа қожалығының иесі жүгінген. Қарағанды облысындағы ауылдардың бірінде елордалық тұрғынның бір табын малы тегін жайылымда болған. Малдың қауіпсіздігіне жауапты бір малшы болған. Келесі есеп жүргізу кезінде иесі үш бас ірі қараны таба алмаған.
Малшы малды кім ұрлағанын көрмегенін, жақын маңдағы жайылымдарды тексеріп жатқанын түсіндірді. Келтірілген шығын 800 мың теңгені құраған. Полицейлер барлық қыстақтарды тексеріп, жақын маңдағы ауылдардың тұрғындарымен сөйлескен. Алайда нәтиже болмады.
Мамыр айының басында малшының өзі ұрлыққа қатысы бар деген ақпарат түскен. Полицейлердің тікелей сұрағына 36 жастағы азамат мал бағуды ұйғарғанын түсіндірді. Бірақ оның сатып алатын ақшасы жоқ. Сондықтан ол алдымен қорасына бір шаруа қожалығының сиырын әкелген. Ешкім шығынды байқамаған. Көп ойланбастан тағы екі сиырды қораға айдап кіргізген.
Малшыға қатысты Қазақстан Республикасы Қылмыстық кодексiнің189-бабы (Сенiп тапсырылған бөтен мүлiктi иемденiп алу немесе талан-таражға салу) бойынша сотқа дейінгі тергеу амалдары жүргізілуде.
